Нишастҳои матбуотии вазорату идораҳои Тоҷикистон аз аввали ҳафтаи оянда, 16 июл оғоз гардида, то 3 август идома меёбанд.

Роҳбарони вазорату идораҳои кишвар ба намояндагони васоити ахбори умум дар бораи натиҷаҳои фаъолият дар нимсолаи аввали соли 2018 маълумот медиҳанд.

Нахуст нишастҳои хабарии Вазорати маориф ва илми ҷумҳурӣ, Маркази тадқиқоти стратегии назди Президенти Тоҷикистон баргузор мешавад.

Тавре ба «Азия-Плюс» як манбаъ аз Дастгоҳи иҷроияи Президенти ҷумҳурӣ дар ин робита хабар дод, ҷадвали пурраи баргузор намудани нишастҳои матбуотӣ субҳи рӯзи ҷумъа ба намояндагони ВАО пешниҳод хоҳад шуд.

Қобили зикр аст, ки тибқи супориши сарвари давлат аз 4-уми марти соли 2005, бо мақсади таъмини шаффофияти фаъолияти вазорату идораҳо ва ҳамчунин дастрасии матбуот ба сарчашмаҳои расмии маълумот нишастҳои хабарӣ дар ҳар семоҳа гузаронида мешуданд.

Аммо ба супориши мазкур тағйирот ворид гардида, шурӯъ аз 1-уми октябри соли 2011 нишастҳои хабарии ҳатмии мақомоти давлатӣ дар ним сол як маротиба доир мегарданд. Дар супориши мазкур зикр гардидааст, ки дар сурати зарурат роҳбарони вазорату идораҳо метавонанд дар як моҳ якчанд маротиба нишасти хабарӣ баргузор созанд.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.