Раиси вилояти Суғд Раҷаббой Аҳмадзода охири ҳафтаи сипаришуда ба ноҳияи Мастчоҳ ташриф оварда, ба фаъолияти корхонаи ресандагии ҶДММ «Ангубин» (собиқ «Олимтекстайл) ҳусни оғоз бахшид.

Дар маълумоти хадамоти матбуоти раиси вилоят зикр мешавад, ки, ки бо мавҷуд будани мушкилоти иқтисодӣ корхонаи мазкур давоми беш аз 1,5 сол аз фаъолият бозмонда буд ва бо дастуру раҳнамоӣ ва дастгирии Пешвои миллат муҳтарам Эмомалӣ Раҳмон ва роҳбарияти вилояту ноҳия ба фаъолият оғоз намуд.

Гуфта мешавад, раиси вилоят ба ҷараёни фаъолияти корхона аз наздик шинос шуда, бобати кори пурсамари он дар соли равон ба масъулини соҳа ва роҳбарияти корхонадастуру супоришҳо дод.

Раҷаббой Аҳмадзода дар сӯҳбат бо мутахассисону коргарон аз таваҷҷуҳи роҳбарияти Ҳукумати мамлакат ба соҳаи саноат, таъсиси ҷойҳои нави корӣ ва ба кор андохтани иқтидорҳои мавҷуда изҳори назар карда, гуфт, ки бо ибтикори Президенти Тоҷикистон Эмомалӣ Раҳмон саноатикунонии мамлакат ҳадафи чоруми миллӣ эълон гардида, дар ин замина баъди аз фаъолият бозмондан ба кор шурӯъ намудани корхонаи мазкур ба рушди соҳаи саноат дар ноҳия, ба кор таъмин шудани занҳои маҳаллӣ ва беҳтар шудани сатҳи зиндагии мардум мусоидат хоҳад кард.

Чуноне муовини директори корхона Шариф Неъматов иттилоъ дод, корхона имкон дорад, дар як сол 6 ҳазор тонна нахи пахтаро коркард намуда, 10 намуд ресмон истеҳсол намояд.

“Алҳол дар навбати аввал 420 нафар коргарон, ки асосан сокинони ноҳияи Мастчоҳ мебошанд, ба ҷойи корӣ ва музди меҳнати арзанда таъмин гардида, дар ду баст фаъолият менамоянд. Ояндаи наздик ният дорем, ки корро дар се баст ба роҳ монем”, - гуфт муовини аввали роҳбари корхона.

1/4

Зимнан зикр мегардад, ки корхона бо таҷҳизоти муосири олмонӣ муҷаҳҳаз буда, яке аз беҳтарин корхонаҳои истеҳсолӣ дар самти истеҳсоли ришта дар вилоят мебошад. Барои фаъолияти якрӯзинаи коргоҳ 20 - 25 тонна нахи пахта зарур аст ва алҳол ашёи хом барои истеҳсоли ришта захира карда шудааст. Ашёи хом ба коргоҳ аз хоҷагиҳои кишоварзии вилоят, ҳамзамон аз вилояти Хатлон ворид шуда истодааст.

Раиси вилоят ба раванди истеҳсолот шиносоӣ пайдо намуда, ҳини сӯбат бо коргарон таъкид дошт, ки корхона бояд бо иқтидори пуррааш фаъолият намояд, зеро дар корхонаҳамаи шароиту имкониятҳо барои истеҳсоли маҳсулоти босифат муҳайёст.

Ҳамзамон, Раиси вилоят ба масъулин дастур дод, ки дар коргоҳ истеҳсоли маҳсулоти тайёр, ҳам барои таъмини бозори дохилӣ ва ҳам барои содирот роҳандозӣ гардад.

- Алҳол ба маҳсулоти пахтагӣ дар бозори ҷаҳонӣ талабот зиёд аст. Аз тарафи дигар, бо ифтитоҳи гузаргоҳҳои сарҳадӣ бо Ӯзбекистон корхона метавонад, маҳсулоти худро ба ин кишвари дӯст ва ҳамсоя низ ба фурӯш барорад, - таъкид дошт Раҷаббой Аҳмадзода.

Чуноне иттилоъ доданд, маҳсулоти корхона, яъне риштаро аллакай яке аз коргоҳҳои истеҳсолии вилоят – «Ноҳид» - и шаҳри Истаравшан харидорӣ намуда истодааст.

Раиси вилоят зимни боздид ҳамзамон, ба роҳбарияти ноҳия бобати парвариш ва рӯёнидани бештари ҳосили пахта, таъминоти саривақтии хоҷагиҳои кишоварзӣ бо оби полезӣ, эътибор ба сифати чигити тухмӣ ва дастгирии соҳибкорону кишоварзон дастуру супоришҳо дод.